غيــاب

في غْياب لِيلْ عْيُونِكْ
ليل المْدينَة شاتي
وِالنّاس رِيتْ حْياتْهُم
مِتْعَثّرَة فْخَطْواتْهُم
مِتْلَعْثْمَة

وِسْكاتْهُمْ
نابت وَجَعْ في سْكاتي
في غْيابْ لِيلْ عْيُونِكْ
لِيل الْمدينة شاتي .

ليل المدينة شاتي
وْحِلْم المْدينة
وْكَاسْهَا المَكسُورْ
يجرح ذاتي
والناس بَذْرِةْ عِيدْهُمْ
مِتْرَسّبَة فْ تَنْهِيدْهُمْ
لا ثَمْرْ يِكبِرْ فِي إيدْهُمْ
لا وَعْدْ بِاسمِكْ يَاتِي
في غْيابْ لِيل عْيونِكْ
حتّى الْمدينة هارْبَة مِنْ لِيلْهَا لْكِلْمَاتِي

لْكِلْمَاتْ طَعْمِ الْڨُوتْ
لْكِلْمَاتْ ضِدِّ الْمُوتْ
لْكِلْمَاتْ ..
فُوڨْ حْيُوطْ

 لِيلِ الْمدينَة الشَّاتي