... وطن وإن كان

يِمْكِنْ يكون الرّسمْ سُريالي

وْيِمكن خَبْطْ ألوانْ في ألوانْ

وْيِمكن نْزيدُه بَعض مِنْ حالي

وْيِمكن نْزيدُه ذاكرة وْنِسيانْ

وْيبقى رَسْمْ

مِنْ طين آمالي

نِصفُه وطن

نِصفُه حلم إنسانْ

وْحتّى إن محيت الرسم من بالي

يبقى وطن

مصبوغ في الوِجدانْ

مِثْلِ الْوَرْدْ في كْتابْ
وْمِثْلِ الْوَجْدْ في هْذابْ
خبّي الْوَطَنْ في حُلْمْ
وْخَبّي الْحُلْمْ في غْيابْ 

خبّيهْ طَيِّ الشُّوڨْ
تحتِ الْوجيعة وْفُوڨْ
وْإنْ كانْ حتّى الشُّوڨ ..

في حدّ ذاتُه ذابْ
تَعبْ وْشِـڨا وَحْرُوڨْ 

وْعِشْڨْ وْعَناءْ يِنْسابْ

خبّيهْ في ثُوبْ الْعِيدْ
في وْعودْ ، في مْواعيدْ
وْإنْ كانْ حتّى العيدْ خلَّى هْلالَه وْغابْ
يِكْفيهْ كُونَه بْعيدْ 
عَلى زَمَنْ غَلاّبْ 

وْإنْ ما لْڨيتْ مْكانْ
خبّي الْوَجَعْ فألوانْ
وْعَلى جِذْعْ نِسيانْ
إرسِمْ وَطنْ وْأحبابْ
يِكفي وَطنْ  .. وْإنْ كانْ
في ذاكْرِةْ ألوانْ
يِكفي وَطَنْ  .. وْإنْ كانْ
في حُلْمْ ، طَيّ غْيابْ
مِثل الوَردْ

في كْتابْ
وْمِثْل الوَجدْ

فأهذابْ