سر الدودة

غُدوَة ملفوف فْغُدواتُه

وانا لَافِفْني الحرير

هو يَعْرَى .. تَعْرَى ذاتُه

وَانا نَعْرَى لحظة نْطِير ،

سرّي فْعُمري الأكبر مني

حتى لو هالعُمر قْصير

عُمْرِ الفَرْطَطُّو السَّاكِنِّي

مِنْ وانا دودةْ حرير

  

حكمة الغراب

عَلِّمتكْ اِلّي تُڤتلُه تْواريهْ

تَحت الترابْ أو تَحتْ صف اَحجار  ،

علاش ساكن 'البارح' وعايش فيه ؟

أَمْوِتْشْ مِنْ ساكن جُثَثْ أفْكارْ ؟! 

زلزال

 

دَمُنا من تحت الأنقاضْ

يصرخُ وبأصواتٍ حية :

مات العَرَبُ /الكَرَبُ /الجَرَبُ ...

حتى الجامعة العربية

سقطتْ ما بين الأفخاذْ

والأردافِ

ـ بمسؤولية ـ

مَيِّتَةً في الإنسانية

عصفور

عصفور  وْڤلبُه في جْناحُه

مشدودة انفاسُه لِبْراحُه

طاير ما يخاف إلا جُوعُه

في جوعُه مكمنْ لِطياحُه ،

واحنا يا ڤْلوب على هَدْوَة

تسري مِالنجمة وْعَالنّدوَة

تمشي وعينيها على غُدوَة

وتبدأ الموضوع مْنِ صْباحُه

مثل العصفور ..

وڤلب العصفور ..

وأنفاسُه وريشات جْناحُه  .

 ...

حاطط / طاير فُوڨ أغصانُه

مَعْ إنِّ الدِّنياتْ أوطانُه

ڤُوتُه في صوتُه مْخَبّيه

وْطاويها هْمومُه فَالحانُه ،

وشايف لِبلاد وما فيها

والكذب اللي عام عليها

إلّي حاميها /حْراميها

وِالّي بايعها لصُلّاحُه .

وَاحنا اللي ما نڤولوا "أحنا" 

دواها كِ تِشْتَد المحنة

لا فْمَسِيرِتها روّحنا

ولا من سيرتها نِرتاحوا

مثل العصفور  ..

وڤلب العصفور  ..

وأنفاسُه وريشات جناحُه

  

موسيقى

ما كانش مِحتاج لمعنَى

ما كانش مِحتاج وْنَسْ ،

كان مِحتاج لصُوت وْحِسْ

يَكْسِرْ بيه سْكاتُه

ويُوصل بيه لذاتُه

وْيجرح فيه ثْنِيّة

ياخذ فيها نْفَسْ  .

إللِي حط يْدِيهْ في الماءْ

وحرّك رغبة في الأشياءْ

باش تْحِسْ 

وْباش تِتْحَسْ ،

حَط يْدِيهْ في الحْقِيقَة

وْحَرّكْها ..

 خْلَقْ الموسيقى