البــاهيــة

مِتْحَنّيَة بْلَيّام 

متلحفة في سكاتك
خضراء خضار مْنَام

والحلم لون حياتك
عام اِنْسَكَبْ في عام 

حتى ثْمِلْتِ أوهام
ومازلتِ يا هالباهية .. متغربة في ذاتك 

مِتغرّبة ، واللّيل

ماليكِ .. مالي ضْلوعكْ
والضّيْ فيكِ ڨْليل

مخنوڨ وَسْط خْضوعكْ
لا ريح فيك تْمِيل

تِمسح غْزير دْموعِكْ
وْلا شمس فُوڨكْ زاهيَة

تِشْهِدْ عَلَى هزّاتكْ
ومازلتِ يا هالباهية .. مِتغرّبة في ذاتك

هِزّي بجذع الرُّوحْ

تِسّاڨط الكِلماتْ
وْنِشّي العَرَڨْ يْفُوحْ

من نهد هالسّاعاتْ
خَلّي التَّعَبْ يْرُوحْ

وتْجِفْ هالدّمعاتْ
وِ يْبان يا خضراء خْضارِكْ

مِلْتحِف نَسْماتِكْ

وْ ما تْعُودِي يا هالباهية .. مِتغرّبة في ذاتك