الكلمة الفجرية (يا صوته)

إلى روح الشاعر بلقاسم اليعقوبي

مازال حَيّ يْغَنِّي

وْمازال بِـينْ الجَرْحْ وِالكِلْماتْ

طالَعْ حَذَا النَّجْماتْ

يا لِيلْ أسْمَعْ مِنّي

مَنْ شَافْ وَطْنْ مْحَنِّي

وِصْغَى لْڨَمْرَة تْغَنِّي

وْرِيحْ هازَّة جْوَاباتْ

ما تْڨُولْ عَنَّهْ ماتْ !

هَالخَطّ إلّي فْكَفِّكْ هاتَهْ

حُطَّهْ عَالْخَطّ إلِّي فْكَفِّي

وْهَالصُّوتْ إلّي مِنْ تَحْتْ سْكاتَهْ

طالَعْ طِيرْ وْرِيشَه مْصَفِّي

يا صُوتَهْ

يا رْفِيڨْ حْياتَهْ

عَدِّي عَالغِيبَة الِّي خْذَاتَهْ

فُكَّهْ مِنْ لِيلْ الظَّلْماتْ

وْفي الكِلْمَة الفَجْرِيَّة هاتَهْ

هاتَهْ يا صُوتَهْ بِالرَّاحَة

هاتَهْ للدِّڨْلَة الدَّرْجاحَة

وَطِّتْ تِتْهَجَّى في جْراحَهْ

شِرْڨِتْ بَعْسَلْها كِ راتَهْ

هاتَهْ يا صُوتَهْ مِنْ إيدَهْ

للنَّجْمَة وِلْڨَمْرِةْ عِيدَهْ

وْلِلرِّيحْ تِشْبَهْ تَنْهِيدَهْ

تَغْسِلْ هَفِّتْها بْدَمْعاتَهْ

هاتَهْ في الكِلْمَة الفَجْرِيّة

يِجْرَحْلَهْ في الصَّخْرْ ثْنِيَّة

وْيَنْبِضْ في ڨَلْبْ الحُرِّيَّة

وْيِشْعِلْ في الجَمْرْ وْلَسْعاتَهْ

وْلُو نايِمْ ..

هاتَهْ مِالنُّومْ

هاتَهْ يكْسِرْ فينا اللُّومْ

آمِسْ يِتْوَجَّعْ في الْيُومْ

وْغُدْوَة مِتْكَتِّمْ في ذَاتَه

يا صُوتَه ..

           يا صُوتَه هاتَه